't Korps

Vaanaof ’t ierste optrejje in 1951 heet ’t Garderizzjemint “De Kachelpiepers” ’n importante plaots in ’t köstelek speul vaan de Mestreechter Vastelaovend.

Al excercerend en musicerend prizzenteert ’t regimint ziech es de “Hoesgarde” vaan Zienen Hoegen Hoeglöstegheid de Stadsprins vaan Groet-Mestreech en trèk ’t same op mèt De Tempeleers.

Dit kolderiek regimint heet z’n oontstoon te daanke aon ’t regimint “Menno van Coehoorn” dat destieds in de Tapijnkazerne in Mestreech waor gelegerd.

’n Aontal militaire vaan dat regimint kaom op ’t idee um ’n kolderieke wach te vörme veur de Stadsprins. Es ierste uniform droog me echte historische militaire pekskes oet d’n tied vaan Napoleon. De bewaopening vaan ’t regimint Menno van Coehoorn bestoond oet zwoer mortiere, die väöl weg hadde vaan ’n awwerwètse kachelpiep. Daomèt is dudelek wie me aon de naom de “Kachelpiepers” is gekoume.

De historische uniforme waore “geliend” dus moos op eineg momint veur eige uniforme gezörg weurde. Daobij veel de käös op ’t “Sjots” uniform. In ’t begin get geïmproviseerd, meh allewijl mèt glengarry bonnet es möts, de doublet, de kilt mèt plaid en, netuurlek de peerdshaore kalbas, de sporran. Nao ’t vertrèk vaan ’t garnizoen höbbe in ierste instantie de aajd-lede vaan de verkennersband ’t houte geweerke vaan de militaire euver genome, boemèt e kosbaar stök vastelaovendstraditie tot op d’n daag vaan vaandaog veur Mestreech bewaord is gebleve.

En nog ummer zien ’t de Mestreechter jonges en meidskes die mèt väöl plezeer en dicipline es Kachelpieper deil numme aon dat köstelek speul roondum de Stadsprins.

Oonder aonveuring vaan de tambour-maître en de commandant paradere tamboers, blozers en geweerdregers, same mèt de veendeldreger en de merketensters neet allein in Mestreech meh ouch tot wied dao boete.

’t Garderizzjemint “De Kachelpiepers” gief daomèt e bezunder cachèt aon Mestreech en de Mestreechter Vastelaovend.

Veer hope us gaw te treffe.

Garderizzjemint “De Kachelpiepers”